Pionirske zajednice, prve životne zajednice (biocenoze) u sukcesivnom nizu. Njima prethode inicijalni stupnjevi (začeci) zajednica u čiji sastav ulaze inicijalne biljke, koje prve naseljavaju neki biološki prazan prostor, na kojem je potpuno uništena vegetacija požarima, zatrpavanjem nižih terena odronjenim materijalom u planinskim oblastima, formiranjem naslaga pijeska u rječnim dolinama za vrijeme poplava, vulkanskim erupcijama, izdizanjem ostrva u morima i okeanima. Biljke koje prve nasele ovakav prostor su rijetke, njihovi međusobni odnosi slabi, a uticaji na životnu sredinu mali. To je inicijalni stupanj u razvoju zajednica. Kada populacije biljaka postanu raznovrsnije i brojnije i njihove međusobne veze i odnosi bivaju složeniji, a djelovanje na životnu sredinu snažnije, formirana je pionirska zajednica, prva prava → biljna zajednica na nekom biološki praznom prostoru. Ona stvara uslove za zajednicu koja će je zamijeniti. U → vegetaciji Crne Gore primjeri pionirskih zajednica najbolje se uočavaju na → siparima u kanjonskim (→ kanjoni i klisure) dolinama rijeka (Piva, Komarnica, Tara i druge), na planinskim siparima, požarištima i druge.