Anemohorne biljke, biljke kod kojih se sjemena i plodovi rasprostiru pomoću vjetra. Ovaj način disperzije biljaka dominantan je na otvorenim staništima, na kojima često duvaju vjetrovi. U šumama, anemohorija je zastupljena kod drveća i visokih žbunova, s obzirom na to da su u gornjim spratovima vazdušna strujanja jača u odnosu na donje. Anemohorne biljke imaju laka sjemena i plodove, često snabdjevene različitim tvorevinama, koje im smanjuju specifičnu težinu tijela. Time je omogućeno da dugo lebde u vazduhu i prenesu se daleko od majke biljke. Maslačak (Taraxacum officinale Weber in Wiggers) i vrbe (Salix L.) na sjemenima imaju dlake, a plod pavita (Clematis L.) snabdjeven je dlakavim „repićem”. Sjemena javora (Acer L.) i brijestova (Ulmus L.) imaju krilate dodatke, dok se sjeme crnog graba (→ Ostrya carpinifolia Scop.) nalazi u mjehurastoj komori.