Bernardi, Đuzepe Toreto (Bernardi, Giuseppe Toretto), ital. skulptor (Panjano, Italija, 24. III 1694 – Venecija, 22. II 1773). Bio je aktivan u Veneciji i Venetu kao klesar oltara, graver gema (intaglio), a poznat je i kao prvi učitelj Antonija Kanove. Član je porodice klesara, učio je kod ujaka Đuzepa Toreta, po kome je i dobio nadimak i čiju je radionicu naslijedio. Pavao Kamenarović (1696–1787), kapetan, brodovlasnik, dobrotvor i mecena, poručuje od njega 1772. glavni oltar sa monumentalnim tabernaklom i figurama Bogorodice i Sv. Josipa za Crkvu Sv. Mateja u Dobroti. Od istog umjetnika poručene su i figure Sv. Eustahija i Sv. Jelene za glavni oltar Crkve Sv. Stasija u Dobroti.