Lekić, Danilo Španac (Kralje, Andrijevica, 1913 – Beograd, 1986), diplomata. Osnovnu školu završio je u Kraljama, gimnaziju u Tetovu, a Filozofski fakultet u Skoplju. Kao pripadnik KPJ, učestvovao je od 1937. kao dobrovoljac u Španskom građanskom ratu, na strani Republikanske armije. Od 1941. učesnik je oslobodilačkog rata u Jugoslaviji (→ Crna Gora u Drugom svjetskom ratu). Bio je na najvišim komandnim dužnostima, a poslije rata nastavio je karijeru kao oficir. Bio je ambasador FNRJ u Brazilu (1957–1961) i nerezidentni poslanik u Venecueli (1957–1960), pomoćnik saveznog sekretara za inostrane poslove (1961–1963). Zatim je izabran za šefa Stalne misije SFRJ pri OUN u Njujorku (1963–1967), pa za ambasadora u Egiptu (1967–1969). Od 1969. do 1974. predsjednik je Komisije za narodnu odbranu Predsjedništva SFRJ. Odlikovan je Ordenom narodnog heroja i sovjetskim Ordenom Kutuzova. Nosilac je Partizanske spomenice 1941.